［瑞幸升夠一個開］但，唔係一早除咗牌？
1. 係喎，冇呃你，已FC。真係升一個開，真係嗰隻瑞幸，被指造假數嗰隻，仲搞到大量花生嗰隻。
2. 不過，我個圖刻意誤導你啦，你睇呢排梗係勁。但，之前50蚊跌落嚟的。但係，「只係」跌85%，又唔係好似爆煲嘅公司喎。18億美金市值架！（癲瘋時就100億）
3. 首先，第一個問題。有人話，喂，明明話隻嘢除咗牌喎。係丫，的確係。有畀佢上返咩？冇喎。當時係在Nasdaq上市嘛（說好了的Nasdaq係科技股，又，星巴克都Nasdaq啦，百事都係），LK，Luckin
4. 但你睇個圖，見到唔係LK啦，係LKNCY。亦都見到寫住OTCMKTS。見到呢啲五六個字嘅code，多數都係呢類東西。去咗OTC交易（Technically 係 Pink，下面解）
5. 即係點？即係，真係在Nasdaq除咗牌的，6月29號已經最後交易日。而家，轉咗去呢個OTC交易咁咯。OTC，就冇乜王管的了，甚至唔係一個「市場」或「交易所」。但總之間公司仲存在架嘛。
6. OTC入面，仲可以再分三級，Pink就最冇王管，基本上咩都唔使理。甚至唔出業績唔核數都得（而Pink入面仲可以再分三類！真係勁），亦唔使同美國證監SEC註冊，總之輸死無怨，用家自負。
7. 咁當然有啲OTC就冇咁流，例如啲外國公司，唔少都係咁上。任天堂呀，LVMH呀都係。NTDOY，LVMUY/LVMHF咁。但SONY就在紐交所直上的，SNE。呢啲之前都提過
8. 咁做乜忽然升？好簡單，因為瑞幸肯科水，同美國證監和解。2億美金之嘛，應該唔算好多錢？最重要係，搞清楚，絶對唔係「罰款」！呢個settlement without admitting or denying wrongdoing
9. 咁都得？實情好常見。同好多人理解唔多同，黑白嘅嘢。當年李國寶畀人話內幕交易，都係咁上下，科水6300萬美金，但一樣係neither-admit-nor-deny玩法。
10. 點解咁奇特？除咗出嚟行求財唔係求氣外，仲有一樣嘢，就係聽聞如果你admit wrong doing的話呢，唔掂的，就會畀其他人民事索償告到你癲。但而家，SEC放過你，而你冇做錯，就唔會開呢個缺口。
11. 唔好話我日日只係貼嘢食同hard sell Patreon啦，雖則呢14日工作效率極低。其實平時Patreon都有時寫類似嘅嘢，呢次免費益你。啱睇咪訂下。被炒咗啦，幫下手嘛。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
Search